不過，唔係所有大型電子屏幕都有呢種效果嘅。好似民政事務總署安裝嗰啲大型電子屏幕，就多數冇人吼，嘥錢又嘥電。

話說政府透過民政總署撥款畀區議會，喺多個社區中心外牆安裝大型LED電子屏幕，話要方便市民獲取資訊，亦可以慳紙，符合環保原則。係人都知道，大屏幕一定要裝喺人流密集嘅地方，先至有人睇，可惜呢啲大型屏幕多數喺隱蔽嘅地方安裝。

嗱，大埔社區中心一幅外牆，近排裝咗一塊四米闊、三米高嘅大屏幕。其實，嗰度人流稀疏，平日每半粒鐘只有十幾人經過，停低睇屏幕嘅人更係少之又少，所以好多街坊根本唔知裝咗屏幕。

仲有更搞笑o架，銅鑼灣社區中心外牆嘅大型屏幕裝喺社區中心頂層，對住行車天橋，地面嘅人根本睇唔到。所以有市民話，都唔知整嚟做乜，揸緊車點睇？除非塞車啦。係咁，不如叫民政總署同警方聯絡，喺屏幕上播放交通消息啦。

叮，就算屏幕安裝喺合適位置，都係嘥氣，例如柴灣興華邨社區會堂外面嗰塊電子顯示板，反反覆覆播放區議會開會日期、團體嘅合照同埋祝賀語，悶到抽筋，邊度有人會睇呀。

話時話，大型電子屏幕呢家嘢都唔平o架，每個造價近百萬元，每年仲要開支十幾萬電費、維修費。嘥咁多錢嚟播放咁嘅碎料，值得咩？正如有立法會議員話齋，無理由唔考慮「收視率」就裝，直情係燒銀紙。

何止燒錢呀，仲好唔環保添，有環保人士踢爆，LED電子屏幕會造成光污染，滋擾民居，難為政府仲好意思話係推動環保！

咁搞法，莫講話市民啦，就連政府內部嘅同事都睇唔過眼。屯門民政事務處曾計劃花七百幾萬喺區內九個地方加裝大屏幕，政府產業署就唔同意，後來對方應承減低聲浪、光度同埋播放時間，先至唔再反對。

叮佢個鎯鎯！最令人睇唔過眼嘅係，民政總署衰咗都唔肯認，署方發言人接受本報查詢時話，安裝屏幕係小型工程，區議會有權決定工程範圍及撥款咁話。一句話就將成鑊嘢卸晒畀區議會，卸膊神功實在一流。難怪有區議員直斥政府輸打贏要，好嘢就係自己嘅功勞，衰嘢就拉埋區議會落水，真係唔負責任。

之不過，請問民政總署署長陳甘美華，夠唔夠膽喺你哋嗰啲大屏幕上面現身，公開話自己一啲責任都冇吖？如果真係咁講，恐怕所有屏幕都會畀人打到爛溶溶。