富貴黨副主席「肥仔張」張宇人喺農曆新年去紐約度假兼探外孫仔，悠悠閒閒湊孫為樂。佢尋日話唔係次次假期都有美好回憶，有啲甚至係噩夢，好似○八年九月去歐遊，因為要不停越洋回覆香港記者電話，長途電話費高達五位數字。佢一面講，一面除低眼鏡抹眼，襯晒佢一殼眼淚嘅主題。
○八年九月到底發生乜嘢事令香港記者瘋狂越洋追瘦肥仔張呢？咪係富貴黨「家變」囉。佢話當時富貴黨喺立法會選舉中受挫，「林健鋒要做主席」，政壇風雲變色，局勢日日有新進展，好多香港記者打電話搵佢攞回應。當時佢正喺意大利旅遊，唔忍心畀記者食電話閉門羹，所以打長途電話覆大家，終於係大傷荷包，張IDD帳單最後以五位數字埋單，佢尋日提起都牙痛咁聲。咁佢要怪嘅就怪3L林健鋒佢哋嘞！
所以，佢今個農曆年去紐約度假，狠下決心關掉電話，度過咗一個二十年嚟最輕鬆舒服嘅假期。