為期三個月嘅政改方案諮詢上星期結束，政制及內地事務局局長「林公公」林瑞麟尋日拉埋副局長黃靜文同常秘羅智光出嚟同傳媒就政改「吹風」，仲幫襯社企買新春曲奇禮盒請大家食，不過呢盒曲奇就洩露林公公想抓緊泛民支持政改嘅心願。
林公公特別推介一款老虎爪形狀嘅曲奇，仲揸住塊餅畀傳媒影相，點知冷不防有人問佢塊曲奇係咪寓意已抓緊白鴿黨嘅支持票，佢聽到竟然手都震埋，連塊餅都攞唔穩差啲跌落地，好彩佢眼明手快接得住，否則認真唔老利。副局長黃靜文事後笑指林公公太用力抓票，就算塊餅冇跌爛，都可能畀佢揸到裂晒。
外界一直揣測泛民議員喺政改問題上開始讓步，而政府要成功游說白鴿黨支持政改方案再唔係不可能嘅任務，難怪林公公一聽到抓緊白鴿黨支持票，即時心花怒放到連手都震埋啦。