今年年初一撞正情人節，好多花店擔心會少咗人訂花，點知又唔係喎！花束銷情都唔錯，即係話啲市民冇慳住個荷包。好似立法會會計界議員「波波」陳茂波一如過往咁送花氹老婆開心，點知就換嚟一殼眼淚嘞！
波波並冇按住個荷包，仲科咗一千蚊去訂咗紮一打玫瑰花添！點知收貨時，即刻跌晒WATT，大呼好失望。
點解？本來佢平時幫襯開嗰間喺灣仔鵝頸橋附近嘅花店嘅，點知去到先知執咗笠，於是換過另一間啦！都係畀咁多錢，心諗都唔會有太大分別啩！就係咁蹺，呢次出事嘞！
可能嗰間花店覺得收得波波咁多錢，都唔可以賺到咁盡o架，見束花咁細紮，於是幫佢撐大佢。但波波形容花店加咗好多草同菜做陪襯，束花係好大紮，但就唔靚囉。
呵！難怪波波有咁嘅反應嘅，紮花妹仔大過主人婆，睇怕佢勢估唔到一千蚊買花竟然買咗棵菜。
咁都冇法o架，嚟緊嘅元宵咪送過紮花囉！但波波話唔會咯，到時會同老婆去維園猜燈謎喎！又係嘅，見過鬼仲唔怕黑咩！