預言港幣被邊緣化

經濟學家出身嘅劉遵義解釋，十幾二十年前返內地消費，間間舖頭嘅店員都爭住收港紙，仲開心過收人仔，但今時唔同往日，佢班朋友去內地打高爾夫球，畀一百蚊港紙貼士，以為大手筆啦，但職員居然唔肯收！嗰個職員仲指明話想收人仔，話港紙兌換麻煩，收嚟冇乜用喎！港紙倒轉頭畀人「歧視」，真係風水輪流轉啦。

劉校長講依家唔少香港舖頭都收人仔，加上人民幣政策轉變快速，話唔定唔使幾耐就可自由兌換，到時香港分分鐘人人都用人仔，冇乜人用港幣喎，情形就會好似依家澳幣咁，澳門人都鍾意用港幣、人仔，偏偏唔係點用自己嘅澳門幣。

對於呢個港幣「被邊緣化」問題，劉校長話初步估計唔會對香港經濟造成好大影響，正如佢諗澳幣消失對澳門經濟唔會有大衝擊一樣。嘩！睇嚟課題咁大，又講到咁長遠，真係要詳細研究過先知啦！咁佢同任總就有排做嘞！

另外，新婚嘅劉校長已經講明，退休後留多啲時間畀自己，唔會再從事全職工作，只會做吓中長期嘅經濟研究，佢仲計劃咗去旅行歎吓，唔知會唔會帶埋老婆去呢？

但尋日喺校長府邸所見，劉校長嘅家庭生活仲係好低調，劉太冇現身同大家一齊拜年，屋內亦唔見佢兩公婆嘅合照，但校長反而鬼鬼馬馬，印製咗有自己嘜頭嘅揮春，祝學生學業進步喎！