原來早喺上年中，泛民中已有人搵全國政協常委CY梁振英引路，想打開北京溝通之門，結果食飽白果。據知當時負責低調接觸CY嘅係公文袋一位立法會議員，仲話最好可以同京官直接對話添。CY冇托手㬹，向中央官員轉達泛民訴求，但政改博弈兵凶戰危，民主派要同京官對話，等如獅子開大口，中央梗係唔會咁容易畀佢哋攞彩啦，點都要觀其行、聽其言一段日子，亦都要喺關鍵時刻至出招，咁至有價值。

主要由白鴿黨為主幹嘅終極普選大聯盟一方面同公社兩黨劃清界線，另方面表現得要積極傾出一個佢哋願意投票嘅政改方案，早前搵全國人大常委范徐麗泰做送信人，表達佢哋好想上京嘅意願，但范太都講到明佢好願意做橋樑，但大家唔好期望咁大，因為就算佢喺北京開聲，亦未必可以達成泛民朋友嘅願望。

譚耀宗：民建聯唔係中央代言人

泛民唔單止喺行動上亂衝亂撞，喺鏡頭前發言一樣貫徹亂石投林呢個主題。白鴿黨主席「鐵頭仁」何俊仁前日話，願與中央官員交流，就算由建仔做代表都可以，喺澳門傾都得。但呢番言論惹嚟建仔主席譚耀宗冷嘲熱諷，譚Sir尋日笑笑口咁反駁，話建仔唔係中央代言人，只係香港一個民間組織，而中央政府喺香港嘅代表係中聯辦，叫大家千祈咪搞錯，擺明寸爆鐵頭仁。

政治嘅嘢，互動關係好微妙，如果泛民繼續亂石投林，出晒洋相，只會掟傷自己，而唔會有一個目標可以掟中。