生活真係艱難，今年元旦一過，筆者常光顧的燒臘店、茶餐廳，已靜靜起革命，碟頭飯加一元幾角，奶茶加五角，煎雙蛋加一蚊……總之樣樣加少少。筆者所租住之單位，包租婆話：見你準時交租，約滿加租加少啲喇！人哋三千，你斯文人，加二千八，好意頭！唔續租就一個月通知！筆者乃「無殼蝸牛」，搬家搬到怕，尤其成萬冊書，只好無奈任包租婆隨「市價」調升，但願租金有日下調時，佢又記得隨「市價」下調！

衣食住行樣樣加價，小市民只感到生活艱難，完全未感到遠方有曙光，近身有溫暖，失業率維持百分之四點九，青少年失業率仍然嚴峻，在職貧窮依然未解決，我做三行嘅阿叔仍然冇工開，教書嘅姨甥去年殺校壯烈犧牲了，搵咗一年工仍未覓得教席！

勞工及福利局局長張建宗說，新年期間營商環境以及消費開支的改善，料可帶動勞工需求，進一步紓緩失業問題。張局長，你的話令我想起美國元勳傑弗遜的幾句話：「從未看過報紙的人，反而會比看報的人知道得更多。他甚麼都不知道的結果，反而使他比那些塞滿虛假及錯誤訊息者更接近真理。」

氣溫又下降了，老伴煮了大煲粥，我歡呼：回家真好！