唔講唔知，講出嚟嚇你一驚，自從學券計劃推出三年嚟，全港已經有百一間幼稚園執笠，仲有十間退出計劃。咁多幼稚園執笠，當然唔可以排除可能同出生率持續下跌有關，之但係，呢個並唔係主因，咁多幼稚園摺埋，其實多得呢個學券計劃。正如有幼兒教育團體話齋，學券計劃帶來諸多掣肘，學費設上限又阻礙咗幼稚園發展，加速幼稚園死亡。

講真，學券計劃並唔係免費午餐，參加計劃嘅幼稚園都要接受專業視學，政府會派人去幼稚園視察，然後寫評估報告。呢份報告犀利咯，簡直係幼稚園嘅生死簿，報告會喺網上發表，邊間幼稚園通得過評估、邊間通唔過，上網一查就清楚。咁就弊傢伙嘞，因為學券係派畀家長嘅，由家長選擇幼稚園，如果你係家長，上網發現乜乜幼稚園通唔過評估，你仲會唔會送個細路入讀吖？

講番轉頭，政府加強對幼稚園監管，派人視學評估，唔係唔好，弊就弊在當局急於求成，對幼稚園要求多多，一評定生死，咁咪即係將部分幼稚園推上絕路。

嗱，不妨舉個例，學券計劃規定幼稚園校長要有教育學士學位，對教師教育程度亦有要求，而且要喺五年內達到要求。咁就玩殘唔少校長及教師喇，臨老學吹打，咁易咩？

仲有噃，有啲幼稚園人手本來就掹掹緊，校長及教師又要進修，依家仲要投放大量資源去應付評估，教師要額外做大量文書工作，你話壓力幾大吖！

唔怪得學券計劃推行唔夠三年，幼稚園就兩極分化，有實力嘅收生愈嚟愈多，實力唔夠嘅就愈嚟愈難收生。加上當局對收費又設咗上限，但係教師又要加人工，結果令唔少幼稚園被慢慢陰乾，最後不得不關門大吉。

有人以為，貧窮家庭如果冇學券嘅資助，細路就唔可以入讀幼稚園。事實啱啱相反，學券制反而加重咗貧窮家庭嘅負擔，因為貧窮家庭嘅細路入讀幼稚園，本來就可以申請免學費，依家每年雖然有萬幾蚊學券幫補，但根本唔夠交學費，自己仲要攞幾千蚊出嚟，你話係咪幫倒忙吖？

一句講到尾，政府當年為咗應付市民要求派糖嘅壓力，急急推出學券計劃，根本冇周詳考慮，結果搞到唔湯唔水，添煩添亂。呢啲咪叫做好事變壞事咯，叮！