早前有消息話出名小氣嘅煲呔曾，有意唔同旅發局主席田北俊續約，改為委任海洋公園主席盛智文，甚至富貴黨嘅死敵經濟動力立法會議員林健鋒接棒，到近日又有風聲話都係會搵番田少，以免畀人話佢記仇喎。真係神又係佢，鬼又係佢！
富貴黨副主席方剛尋日同傳媒傾開，就舉咗差不多半打理由，力撐政府應該同田少續約。佢話旅發局喺田少治下搞得有聲有色，近年嘅訪港旅客數字已經錄得顯著回升，日前田少仲特登縮短同孫仔去外國滑雪嘅旅程，趕返香港主持旅發局新春花車匯演，加上田少出名睇數睇得好緊，由佢掌管旅發局，肯定唔怕再次爆出大花筒醜聞。
方剛又話呢啲咁重要嘅公職，除非當事人中途爆出醜聞，否則一般都會做足六年任期，以免影響機構嘅管治延續性，依家田少只係做咗三年，如果煲呔曾真係唔同佢續約，除咗公報私仇之外，真係冇第二個解釋！