立法會調查白鴿黨議員甘乃威涉嫌求愛不遂炒女助理事件嘅獨立調查委員會自一月八日成立以嚟，近個半月開咗三次會，但至今仲糾纏喺討論開會程序，尚未進入正式調查階段，難怪畀人感覺進度緩慢。有委員半講笑咁話，原因係出自三個女人身上。
呢個調查可謂香港史無前例，委員會成立前又經歷一波三折，所以立法會秘書長Pauline吳文華親自「監工」，坐入委員會做秘書。但有委員透露，Pauline名義上只係秘書，但實際上喺委員會嘅角色好重要，甚至可以話帶住成個會嚟行，例如委員會之前提出一個相當特別嘅建議，希望聆訊容許喺立法會大樓以外嘅地方進行，呢個建議明顯為事件女主角黃麗珠度身而造，一問之下，原來出自Pauline手筆。
有委員尋日語帶感慨咁話，主席「蘇菲」梁劉柔芬出名長氣，另一委員梁美芬亦意見多多，再加上Pauline「監工」巨細無遺，喺程序規例上乜都要揸住放大鏡端詳一番，跟足程序，委員會嘅工作無法快速推進，有乜出奇啫？該名委員雖然冇對Pauline口出怨言，但確實覺得委員會工作唔夠乾脆利落。其實Pauline凡事親力親為並非壞事，但未必人人欣賞，先會惹嚟議員微言。