身為瑪利諾修院學校校友嘅王守業夫人，喺老公大新銀行主席王守業支持下，經好友「眾人媽打」李麗娟作「紅娘」，同母校合作推出「大新瑪利諾修院學校VISA白金卡」，慶祝建校八十五周年。工作時認真又嚴肅嘅王生上台致辭時，娓娓道來當年追求佳人嘅韻事，仲大方直呼太太做Sweetheart，更向太太母校嘅Sister們作九十度鞠躬以表敬意，果然係愛屋及烏。
話說王太當年喺瑪利諾修院學校讀完小學，就過咗海去當年係藍塘道嘅瑪利諾書院繼續學業，再到美國升學。畢業回港後，王太返母校教書，機緣巧合喺鄉村俱樂部邂逅拔萃畢業嘅王生。
為求佳人，王生每日風雨不改去學校門口等王太放學，即使畀王太嘅學生「圍」都冇退卻，最後成功打動嚴小姐成為王太！估唔到咁多年後王生又出冧招，仲「升呢」上台發表愛的宣言添。王太話事前唔知老公有呢段講詞，聽完感動又驚喜。