藍爺尋日話嗰幾日去咗朋友喺元朗嘅別墅玩，而嗰度電話嘅接收力差啲，加上有啲朋友收到電郵後打去佢屋企搵唔到佢，其中有個朋友信以為真，仲諗住喺年初四去銀行入錢，後來打開《東方日報》一睇發現呢單報道，於是即刻掉頭走。藍爺話，真係要多謝《東方日報》，呢位朋友先唔使破財咋！

佢又踩個騙徒英文差，話電郵嘅英文文法唔似歐美，又唔係港式英文，睇嚟應該係出自南亞裔嘅人。咁藍爺英文確係好叻嘅，當年佢喺立法會審議《建築物管理修訂條例草案》時，畀議員冷嘲熱諷，佢突然失控，手舞足蹈咁拋咗句「Everything（is）under control」，簡直就係官場經典啦！

藍爺仲以自己做人辦，呼籲大家要加強電腦保安，慎防電郵騙案。臨走前佢又指住自己頂紅色帽同頸巾，祝大家鴻（紅）運當頭。