政制及內地事務局局長「林公公」林瑞麟向來面對傳媒嘅問題，答嚟答去都係三幅被，點知尋日以署理政務司司長身份出嚟總結政改諮詢時竟一反常態，唔單止按熄咗部人肉錄音機，仲識得「講故事」添！
日前公文袋黨魁余若薇話如果嚟緊嘅補選冇任何對手參與，公社兩黨嘅「公投」就係「不戰而勝」。林公公尋日被問及呢件事時就講咗個古仔，話讀大學時都有代表學校參加羽毛球比賽，好多時會有啲報咗名嘅球隊冇出現，咁出席咗嗰隊就會自動勝出。
佢話呢啲俗稱為「walkover」嘅情況先可以稱為「不戰而勝」，但依家補選在即，唔少黨派已經講咗會杯葛，根本就冇對手可言，仲話：「我未聽過世界上有一啲所謂『公投』，喺零投票情況下，都可以話自己『不戰而勝』囉！」林公公忽發神威，曲線show quali寸爆「公投」，當堂令在場嘅記者O晒嘴！