高鐵項目舊年上立法會財務委員會攞錢，先有菜園村村民不滿賠償方案，繼而殺出一班「80後」青年出嚟苦行，泛民主派議員就乘機大玩拉布戰，令財務委員會開幾日幾夜都審唔完。

早啲登場 泛民冇得打拉布

擔大旗嘅運輸及房屋局局長Eva鄭汝樺亦出盡法寶，唔單止現身八鄉面對村民解釋賠償方案，之後仲邀請傳媒返內地一齊試搭高鐵；事後就透過facebook搞青年論壇，不過得三粒鐘咁大把。

如今高鐵項目嘅撥款爭議已經落幕，不過早幾日中策組首席顧問劉兆佳出信邀請立法會議員，出席下月一號舉行嘅高鐵座談會，開宗明義話要畀與會者了解高鐵嘅大圖像同埋具體效益，除咗鄭健之外，講者仲有港鐵工程總監周大滄，同埋中策組顧問李明堃教授。

按排場睇，呢類座談會應該喺財委會批錢之前搞就差唔多，否則就唔會畀拉布嘅泛民主派議員發圍機會，喺會議上事無大小都問餐飽，更加唔會出現撐高鐵嘅議員都對高鐵項目一知半解嘅情況啦！

話時話，當日Eva請傳媒返內地試搭高鐵就已經夠奇怪啦，照計游說對象理應係議員，唔係傳媒，點解唔請班議員去坐高鐵呢？事關唔少泛民議員都冇回鄉卡，如果請佢哋返去，名副其實自己攞嚟衰，唔單止節外生枝，仲可能掀起另一場政治風波添！Eva當然計過度過啦。

正所謂過咗海就係神仙，今次隔咗成個幾月先嚟搞個遲來嘅雞精班，佳叔擺明係補鑊啦！到時會有幾多議員願意撥冗出席呢？尤其係啲議員可能驚畀人發現，原來之前都係烏Sir Sir咁撐政府嘅。