小白觀點：

高官巡遊 殺傷力更強

大家有冇睇大年初一嘅花車巡遊呀？有美國性感啦啦隊，又有巴西火熱森巴舞，小白老弟當然唔會錯過啦！點知睇睇吓，哎呀，唔係啩，點解會有骷髏骨頭喺街度走嚟走去嘅？嘩！仲有殭屍好生猛咁紮紮跳添！好彩喺呢個時候聽到屋企嘅老人家飯都噴埋出嚟，不斷啋啋聲，先至知道唔係得自己一個時運低，而係全港市民一齊撞到正！

小白老弟係一個百無禁忌嘅人，不過新正頭搞埋啲咁嘅嘢，又真係大吉利是，唔係個個受得住㗎。喂，如果話搵幾個着住Bra Top嘅「80後」示威者抬副壽出嚟，都可以夾硬解做「升官發財」吖。有玄學家仲話搞埋啲咁嘅嘢，會影響香港運程添，真係多得佢唔少。不過話時話，今次都算不幸中之大幸，如果新年流流見到煲呔曾同成班司局災星輪流出場，嗰時咪仲大劑！

阿豪觀點：

虎頭煙花 唔見咁逼真

新年流流「撞嘢」，的確係大吉利是！事緣大年初一晚電視直播新春花車匯演，加插咗萬聖節嘩鬼舞蹈表演，一隻二隻「喪屍」同「骷髏骨」向現場以及電視機旁邊嘅觀眾「拜年」，搞到「啋」聲四起……你哋話嘞，呢鋪係唔係捉蟲先？

真係好整唔整，好似話嗰個虎年煙花匯演咁吖，話就話有個虎頭形嘅煙花，但係大家睇完之後都一頭霧水，莫講話老虎吖，連貓影都唔見有一隻。唉！應該似樣嗰陣時又唔似樣，依家扮嘩鬼就鬼咁逼真，睇到大家啋啋聲。

都係小白兄講得啱，搵啲性感小野貓出嚟亮吓相，就唔使諗爆頭整埋晒啲咩「節慶年」嘅幌子啦。班靚女咁養眼，到時唔理你叫佢「嘉年華會」又好，「香港周」、「香港節」亦好，都肯定客似雲來！

網友觀點……

阿吉：細路睇卡通人物，男人睇艷女，外國遊客睇殭屍……旅發局咁安排唔錯！

老衲：美女他朝也成骷髏，警惕世人唔好迷戀女色呀！

甘仔：班殭屍嘅幕後，唔係「80後」就一定係鬼佬，根本唔知我哋嘅傳統禁忌！

茅山弟子：心中冇鬼咪得囉，怕乜？撞正鏹魔就話濕滯啫！