講都冇人信，咁唔「老利」嘅嘢今年春節唔止出現喺香港鬧市，仲入埋千家萬戶添。如果睇過大年初一晚上電視直播嘅新春花車匯演，一定知道太一叮講緊乜嘞。

一年一度嘅花車巡遊等於同全港市民拜年，除咗要夠氣氛、有睇頭，至緊要講意頭。當日匯演主題係「節慶年」，點知慶祝端午節嘅大鑼大鼓同舞龍舞獅之後，突然跳咗班着住螢光骷髏頭衫或者黑袍嘅「嘩鬼」出嚟跳勁舞，塊面搽到鬼咁古怪。

最攞命就係，背景音樂居然變成米高積遜嘅《Thriller》，唔止「驚慄」，直頭攞膽。搖滾天王舊年啱啱走咗，家陣突然喺眼前「翻生」，撞鬼咩！唔怪得現場觀眾即刻「啋」、「啋」聲啦。

咁都未夠激，跟手仲有個「萬聖狂歡醉人夜」表演，一班着白禮服嘅「吸血鬼」突然揭開冚住墳墓嘅大紅布衝出嚟，青面獠牙，眼露兇光，仲不斷高聲怪叫，觀眾幾乎畀佢哋嚇死。現場有位老婆婆大鬧：「中國人最忌新年撞鬼，靠害咩！」

叮！鬧得冇錯。日光日白見到啲咁嘅嘢都打個突，更何況大年初一？就好似見到個骷髏頭講「恭喜發財」咁，貪「老利」咩！正如有玄學家話齋，傳統要以喜慶行先，新年撞鬼令人有心理陰影，甚至會行衰運。咁大整蠱，簡直係靠害。

知唔知乜叫入境問禁㗎？農曆新年話晒都係華人社會傳統大節，好心留意吓民風習俗，睇吓有乜禁忌先啦。失驚無神搵班人「扮鬼」，仲透過電視全程直播，咁即係新正頭逼全港市民睇埋啲妖魔鬼怪啫！

話到尾，萬聖節係西人嘅玩意，移植過嚟都要入鄉隨俗至唔會撞大板。何況正值中國人傳統節日，更加唔能夠百無禁忌亂咁嚟。如果搞個大南瓜頭表演，既唔會咁核突恐怖，亦可以顯出節日氣氛，總好過跳骷髏頭舞啩！

嗱，睇吓美國吖，今年春節中國有個「千人旅行團」去紐約，人哋就識做嘞。有著名百貨公司喺門口用中國舞獅表示歡迎，仲有禮物送添；當地地標帝國大廈掛晒紅燈籠，着晒金、紅兩色綵燈不特止，更專門搵兩粒鐘淨係招呼中國豪客。最絕就係，帝國大廈仲搵埋荷里活巨片《金剛》嘅主角大猩猩做親善大使，不知幾咁受歡迎。如果掉轉係搵隻「吸血殭屍」出嚟，睇怕班中國遊客走清光都似。

唔該香港花車巡遊主辦單位學吓嘢，吸取教訓，下次咪再將年初一當萬聖節，迎春接福變迎春接「鬼」喇。叮！