話說中心有間懷舊閣，擺滿中式家具，當中放咗張紅木麻雀枱同一副麻雀，身為雀林高手嘅阿John一時興起，即場獻技表演甩麻雀，一甩就估中係隻「九筒」，逗得側邊識打麻雀嘅高錕笑笑口。

有講法話打麻雀有助延緩老人癡呆症患者病情，既然阿John同高錕乃多年好友，大家可以考慮得閒打番十二圈切磋吓，助人自助嘛！

難得高錕夫婦親身到訪支持耆智園發展，阿John向高錕夫婦送贈刻有二人名字嘅馬會筷子。高錕話雖然自己身在外地生活，但仍習慣用筷子，所以呢份禮物非常合用喎！高錕亦禮尚往來，回贈一本中文大學高錕成就展嘅場刊畀阿John，阿John就對高錕話：「香港人以你為榮！」

耆智園喺二○○○年投入服務，為老人癡呆病患者及其家人提供適切服務同訓練，以減慢患者嘅認知能力衰退速度，紓緩家屬照顧患者嘅身心壓力。