蔡堅話過年前肚痛咗兩日，年廿九情況加劇，又燒到攝氏四十度，惟有入醫院。佢由有「朱大腸」之稱嘅老友朱建華主診，發現佢細菌入腸，患上急性腸炎，吊咗幾日抗生素，入院五日瘦咗五磅。

嘩！細菌入腸，咪話肥膩嘢，睇怕乜都唔食得落肚啦，好似蘿蔔糕、年糕、油角等呢啲賀年食品就更加唔使旨意掂，可能要發夢先食得到嘞！

講起公立醫院每逢新年會搞吓氣氛，私家醫院可能都會有類似活動，但佢話買咗保險住頭等房，四周圍都冇人，恍如與世隔絕。新年要喺醫院過已經好唔開心，最慘就係睇唔到年初二嘅煙花，呢幾日唔係對住四幅牆，就係睇報紙同上網，其實都幾悶。

好彩佢住嗰間私家醫院，好多喺度掛單嘅醫生例如醫學會會長謝鴻興、副會長陳以誠同會董林哲玄都有去探佢，算係都有啲聲氣啦！咁幾時出院呀？佢話如無意外，留醫多一至兩日就出得院嘞！