「五區公投」係建制派同民主派嘅大戰，亦係泛民陣營內公社兩黨同白鴿黨嘅路線之爭，誰勝誰負，左右白鴿黨嘅未來興衰，所以由白鴿黨牽頭另起爐灶嘅終極普選大聯盟一踏入虎年就不停出招造勢，希望力壓公社兩黨嘅氣燄。早前見完政務司司長唐唐得到啲正面回應，算係嘗到甜頭；尋日再下一城，約見全國人大常委范徐麗泰，不過，佢哋獅子開大口，要求上京同中央官員直接傾政改，變相自設超高難度動作，自己玩自己。
知情人士話，北京嘅溝通大門唔會關上，但普選聯盟要求上京見京官，叫價實在太高，唔好講三月起行太倉卒，呢個要求根本從未上過北京嘅議程，即係考慮都冇考慮過，事關普選聯盟講終極普選，中央講循序漸進，雙方差距咁遠，點傾呀？
事實上，普選聯盟能否上京，中央要兼顧考慮嘅方面極多，唔係有冇時間見你咁簡單，單係要顧及建制派陣營中人感受就相當高難度。建制派政黨、商會、人大、政協同工會等一大棚人做「爛頭蟀」撐政改，冇功都有勞，佢哋都未獲中央官員接見鼓勵士氣，反而普選聯盟嗌兩句就有得上京，可能會令一班建制派人士唔高興，有損士氣。
所以照牌面睇，范太見普選聯盟，對緩和北京同泛民嘅繃緊氣氛確有作用，但普選聯盟想借獲安排上京攞頭彩，結局隨時係「春夢一場了無痕」。