瓣瓣食住上

尋日由佢做召集人嘅民間策發會開記招講政改方案，提起煲呔曾佢又再扯火，諷刺煲呔曾話會就五區總辭依法辦事，安排補選，身為特首唔可以左右選民嘅投票意向，更加唔應該向公務員、問責官員施壓，因為投唔投票係選民個人決定，如果政府脅迫他人杯葛選舉，係違反《選舉條例》；之後仲大大聲叫煲呔曾做好榜樣，補選當日出嚟投票。

其實民主阿婆近年不停咁踩煲呔曾，對上一次係食住反高鐵個勢，狠批事件歸根究柢係政府施政出問題，煲呔曾解決唔到社會深層次問題所致；之前泰國包機事件又鬧晒成個政府，順理成章將隻鑊掟喺煲呔曾前面，總之就係咬住唔放啦。