尋日咁啱撞到行政會議成員張炳良，當然問吓到時鬍鬚曾會唔會派糖啦，點知佢都話「派糖」呢兩個字唔多啱。點解？佢話「派糖」嘅意思係將啲糖塞入人哋把口度，只係搵啲甜頭塞住人哋把口，若果庫房有錢就應該針對市民嘅需要，推出啲紓民困嘅措施，而唔係「派糖」喎！

一改行會壞孩子作風

聽佢嘅口脗同鬍鬚曾一模一樣，唔通因為係行政會議成員所以要集體負責？唔似佢嘅作風喎，事關之前佢都做過壞孩子，同政府唱反調，復建居屋就係其中一個例子。

話鋒一轉，講到公社兩黨五區總辭，建制派杯葛補選，而煲呔曾同部分高官多次強調補選唔係變相「公投」，煲呔曾仲帶頭話屆時唔會投票，有啲問責高官又話要跟大隊添！

張炳點睇呢次補選呢？佢話睇番外國嘅情況，高官好少出嚟叫人投票，亦冇話好似香港咁搵啲名人或公眾人物出嚟呼籲投票，可見呼籲投票對選民嘅投票意向影響好小啫。

咁煲呔曾話唔投票係咪講得太早呀？張炳話應該係傳媒問得太早啫。佢似乎想幫煲呔曾解圍咁噃，咁會唔會投票呢？佢話本來就唔同意泛民主派搞五區總辭，依家佢哋辭咗職咯都冇辦法，既然係補選，政府都應該宣傳嘅。

再問佢係行會成員喎，投唔投票使唔使跟大隊？張炳又話投票權同被選權係公民嘅基本權利，冇人可以叫佢唔投票。即係點呀？再三追問佢到時會唔會去投票，佢最後先話睇吓有啲乜嘢候選人先啦！

好明顯喺度顧左右而言他啦！咁又係嘅，煲呔曾一句唔投票就畀泛民插到飛起，梗係有壓力啦，張炳依家封口唔敢表態，睇怕係費事重蹈煲呔曾覆轍，惹禍上身！