小白觀點：港產片偷拍都嫌嘥電

聽聞本港戲院電影盜錄問題嚴重，戲院商會搞到要買軍用夜視鏡捉人。嘩！使唔使咁誇張呀？好心香港電影人唔好賴晒落偷拍度啦，好電影自然引到人入場，你估《阿凡達》冇人偷拍咩？我有個朋友睇完「戲院版」之後，再乖乖畀錢入場睇咗五次呀。近年嘅港產片認真唔生性，一係乜鬼《七十二家花田喜事之二○一○》，一係就係《獨家十分愛》，真係偷拍都嫌嘥電！

不如咁吖，趁美國航母尼米茲號訪港，反正艦上嘅海軍陸戰隊同Navy Seal閒來冇事做，都係去駱克道搞搞震嘅啫，不如畀佢哋乘機賺賺外快發個新年財，帶埋步槍呀、迫擊炮呀咁，守住喺戲院四個角落，一見人拎出手機之類可以拍片嘅器材，直頭當遇到塔利班咁，即刻大叫「Fire in the hole」，再掟個手榴彈過去，睇吓以後仲有邊個夠膽偷拍！

Blog：http://sunsiupak.blogspot.com

阿豪觀點：現場版「導賞」夠盞鬼

戲院盜錄嘅問題原本好嚴重，據講○八年有成九套美國電影嘅翻版因為咁樣流出海外，戲院商會為咗因應呢個情況，發明咗用軍用夜視鏡，檢查有冇人違規盜錄，結果舊年一單戲院盜錄都冇。

講就好似好厲害咁，其實依家仲邊有人睇咁低質素嘅老翻呀？老翻商人都驚畀客仔尋仇啦吓話！不過咁，戲院盜錄版內容多姿多采，有好多正版冇嘅bonus，淨係有真人「導賞」即時同步分析劇情，就夠晒盞鬼啦！

與其話係軍用夜視鏡建功，不如話係任達華個廣告見效。大家都記得，電影開場前會播放廣告，任達華扮演嘅海關督察牛咁眼咁指住觀眾話：「仲偷拍？香港電影業就係咁樣畀你哋搞『round』喇！」可能佢演慣PTU，真係不怒而威，本來揸住部機入場嘅不法分子，畀佢嚇到跌爛埋搵食架生都有之。

Blog：http://lukchiho.blogspot.com

網友觀點……

四圍超：用道具掩飾迷你攝錄機，用夜視鏡都搵唔到啦！

lazybone：唔畀黑客入侵電影公司電腦攞片派出街咩！

帶位員：為阻嚇老翻而引致騷擾，完全唔尊重觀眾！

海公公：喺四圍都有人監視嘅環境下睇戲，相當冇癮喎！