籤文係講一名古人離鄉別井，外出謀生，對家人日有所思，夜有所夢，終於接到家人嘅平安訊息。解籤師傅話，支籤係寓意「先難後易，凡事可許」，而且「有求必應」。佢仲話，現時經濟雖然一般，但只要港人努力工作，勞資合作，一定會一日比一日好咁話。

劉皇發亦好滿意，猛話支籤唔錯，仲話先難後易好正常啫，只要凡事有共識，大家加吓油，問題就可以解決。

發叔舊年為香港求得一支下籤，解曰「內有家鬼，自身不安，家宅不吉，求財不遂」。返轉頭睇，條籤都幾靈。一場金融海嘯，搞到人人「求財不遂」；咁仲未止，市民全年都受鏹魔威脅，直情「自身不安」；年尾更發生土瓜灣冧樓慘劇，果然「家宅不吉」；就連禮賓府都被家務員帶班八十後入去玩到天翻地覆，應埋「內有家鬼」。嘩，樣樣都中晒，發叔有乜法子唔心有餘悸，依家求到支中籤，梗係如釋重負啦。

話時話，今年支籤確係比舊年好，起碼冇啲唔吉利嘅字眼，如果真係照發叔咁講，香港今年有運行㗎。之不過，太一叮就冇咁樂觀嘞，事關求籤問卜呢家嘢，唔同嘅人有唔同演繹。

嗱，本報搵過另一位解籤師傅，佢嘅解釋就好唔同。籤文中「睽別家園歲月多」係話香港民心仲未依歸政府；「不知家內若如何」係話政府內部及立法會各黨派唔齊心，挑撥離間，令市民「唔知政府做緊乜」；第三句嘅「夢」字代表假象，暗示樓市股市上升唔真實；最後一句嘅「訛」字，寓意高官講話得啖笑。解籤師傅奉勸市民自求多福。

呢位師傅講得又幾啱，政府確實喺度夢遊，根本唔知自己做緊乜嘢，似足嗰個卡通版煲呔曾咁款，一邊發夢一邊喺浮雲上面飄呀飄，卒之跌番落自己張床上，仲未醒。

高官發緊夢，又點知市民諗緊乜嘢。遠嘅唔講，近排股市樓市暢旺，庫房豬籠入水，但係基層市民依然望天打卦，期望政府推出紓困措施，當局好似借咗聾耳陳對耳，唔理民間呼聲，喺咁嘅情況下，社會又點會齊心噃。先難後易可能係真嘅，不過唔知要難到幾時先至有易呢？

總之一句講晒，政府係靠唔住嘅，香港人想否極泰來，惟有自求多福喇！