海關根據市民投訴，舊年十二月採取「放蛇」行動，喺多間海味舖買咗話係來自日本、澳洲或南非等地嘅鮑片，經化驗證實全部係螺肉。過去一個禮拜，海關突擊搜查多區共三十一間海味舖，檢獲總值約三萬蚊嘅一百一十幾斤假乾鮑片。

海關提醒話，呢啲一百到五、六百蚊一斤嘅假貨，售價同郁吓幾千到過萬蚊一斤嘅真貨差距好大。咁大塊鮑魚片通街賣，市民要小心識別，一味貪平，隨時中招。

叮！呢鋪幾惡搞噃！挨年近晚，個個趕住辦年貨。經濟麻麻，好多打工仔咪話雙糧，過咗年仲有冇工開都係未知數。但新年難過年年過，團年飯點都要好好睇睇，百幾蚊一斤「鮑魚片」，買嚟煲啖靚湯都唔算過分。誰知死慳爛慳，畀無良奸商搵晒笨，「鮑魚湯」原來係螺肉湯，咁就該煨咯。

查實，海味舖售賣假貨劣貨早有前科，奸商呃人亦唔使等到新年。消委會舊年全年收到八十八宗購買海味嘅投訴，比○八年增加一成。有師奶喺藥房外見到有攤檔賣八十蚊一斤嘅花膠，一口氣買咗十斤，返屋企至發現全部係假貨。藥房話攤檔係流動小販，唔關佢哋事。至於用仿翅代替真翅，或者價錢牌以両代斤呢類不良銷售手法，就更加普遍。

叮！香港自封係「購物天堂」，但不斷爆出奸商侵害消費者權益嘅醜聞，如果當局唔正視問題，除咗港人消費信心受影響之外，「旅遊之都」嘅聲譽亦都會受損，本港旅遊業會受到嚴重衝擊。

嗱，旅遊業議會估計，今年春節黃金假期期間，每日會有三百五十個內地團來港，比舊年同期上升百分之七至十。同胞落到嚟，購物係重頭戲之一，除咗去專門店掃高檔名牌貨之外，仲有一樣幾乎人人必買嘅「至愛」，就係嬰兒奶粉嘞。

近排三聚氰胺復活，毒奶再現神州，愈來愈多內地家長湧嚟香港搶購奶粉，令本港奶粉供不應求。有商戶索性違規銷售外國水貨，呢啲奶粉只有外文說明，冇依法貼上中英文食物標籤，無從知道產品成分、產地等資料。

有消費者買咗話係荷蘭出嘅奶粉，睇真啲包裝，其實產地係泰國。甚至有人喺網上廉價出售只用錫紙包裝、產品資料一概欠奉嘅「奶粉補充裝」，當局一樣唔去監管。

人哋山長水遠嚟購物，都係諗住香港賣嘅貨品無論品牌定質素都有監管、有保障啫，如果唔好彩買咗「包騙」螺肉或者三聚氰胺奶粉返上去，香港真係乜架都丟晒，「購物天堂」塊金漆招牌睇怕都保唔住咯。叮！