依家香港政壇只可以用個「亂」字嚟形容，公社兩黨想以五區總辭搞變相「公投」，但係建制派唔同佢哋玩，又有建制派議員想逼政府修例，唔畀辭咗職嘅議員再選番入立法會，打亂晒公社兩黨嘅陣腳，呢場戲都唔知點收科。
尋日同建制派嘅廠商會代表林大輝傾開，對於唔少建制派都杯葛五區總辭後嘅補選，佢話立法會有五個議員辭職已經係一齣悲劇，依家預見到投票率會低、社會又冇乜討論，就更加係一齣「冇票房嘅悲劇」。
大輝咁講又未嘗冇道理，事關呢排啲民調結果顯示大多受訪市民唔贊成總辭或變相「公投」，但係公社兩黨偏偏逆民意而行，難怪市民唔騷佢哋。咁早前煲呔曾話唔會喺補選投票喎，大輝會唔會跟隊呢？佢話仲未諗定會唔會投票，遲啲等佢哋出埋政綱先算喎！
尋日係年廿八，要大掃除之餘仲要破舊立新，大輝話今年嘅新年願望係希望可以成功轉型，由全職生意人轉做全職政治人。佢話做咗議員年幾，愈做愈過癮，所以今年立定決心將工作重心放喺政治工作上，仲話到遲啲時機成熟嘅時候，都會考慮轉做直選議員。咁會唔會再轉型做官呀？大輝就笑笑口唔肯講嘞。