新鴻基地產副主席Thomas郭炳江向來好關心年輕人發展，最近佢就應經濟動力嘅立法會議員林健鋒邀請，喺灣仔新鴻基中心大本營同三十名中文大學學生會面，暢談營商之道同人生經驗。喺地產界打滾三十幾年嘅Thomas話，營商成功秘訣在於喺做每項商業決定之前，要從宏觀環境同微觀角度去分析，宏觀方面要睇地點、時機等，微觀就要睇供求定律。
不過，Thomas話隨住經驗不斷累積，逐漸體會到「人」嘅因素非常重要：「最初確信地點係成功要素，其後漸漸發現時機都好重要，但到咗今日，我深信人與團隊，先至係成功嘅關鍵，我哋必須要有一隊合適嘅團隊，組員間能互相產生化學作用，項目才能按計劃地圓滿完成。」佢講得冇錯，若果冇隊形，真係做乜都唔成。