眾所周知，東區區議會主席丁毓珠交遊廣闊，有好嘢定會同好朋友分享，最近佢啲老友們又收到佢送嘅八珍芋頭糕喇！原來佢幫襯咗老字號八珍已經十幾年，勁鍾意佢哋嘅芋頭糕夠香濃、材料又多，而且食極都唔厭！
珠姐話，佢都好鍾意八珍嘅蘿蔔糕同埋其他糕點小食，但芋頭糕喺佢心目中永遠係第一名，佢每年都要訂二十幾底送畀朋友知己。
八珍已經係七十幾年嘅老牌子，好多香港人一出世就會聞到佢哋嘅甜醋香味。被稱為「坡妹」嘅財經事務及庫務局政治助理伍潔鏇，正係創辦八珍甜醋嘅伍偉森家族第三代傳人。
聽八珍旺角道分店經理莫小姐話，佢哋嘅芋頭糕係選用廣西正宗荔蒲芋頭，入面嘅材料都好豐富，有臘味、蝦米、厚身冬菇同金華火腿粒，食落又甘香又夠粉。年近歲晚，淨係呢間分店就日售超過一千底芋頭糕、蘿蔔糕同埋各式年糕。