知情人士話可能係煲呔曾太錫肥仔，諗住從輕發落就算，但見件事炒到㷫合合，諗住等肥仔放多陣長假先再返工，到完咗煲呔曾嘅任期先唔同佢續約喎。

兩人有唔少共同嗜好

不過，facebook早就有人發起咗「禮賓府燒烤團」，話每人畀三十蚊就可以入去BBQ，已有一千三百幾個網民加入，唔少網民狂轟特首辦依家擺明想將件事不了了之，堅持要睇到肥仔被處分先肯罷休。睇嚟煲呔曾想側側膊過骨都冇咁容易！

點解煲呔曾咁錫肥仔？據聞原來兩個人有唔少共同嗜好。知情人士話肥仔嘅電腦IT同攝影技術都唔錯，煲呔曾有時仲會請教佢有關IT嘅問題。傳聞肥仔又喺禮賓府帶頭用iPhone，掀起一股iPhone熱，最後連煲呔曾都用埋一份。煲呔曾一向被批用人唯親，大家不妨睇吓肥仔呢單嘢係咪另一例證。