立法會秘書處可能見到大家嘅壓力指數已經徘徊喺警戒線，於是安排著名精神科醫生葉恩明教吓一班申訴部職員同各議員助理點樣處理壓力，等大家可以管理好自己嘅情緒。

咁又係嘅，申訴部班職員同助理平時接市民投訴接到手軟，有啲投訴仲煩到爆，真係隨時會爆煲㗎！咁佢哋啲老闆，即係議員又點呢？

好似建仔嘅議會新丁李慧琼，尋日聽到立法會秘書處搞呢個講座，佢即刻呻話自從入咗立法會之後，唔單止白頭髮多咗好多，兼且未有時間適應自己嘅議員身份，就遇着雷曼爆煲，要加入調查小組幫手；而早前高鐵撥款燒到嘅大角咀，喺佢所屬嘅九龍西選區，仲有更大鑊嘅係馬頭圍道冧樓慘劇，搞到佢日日瞓唔安食唔落，好大壓力咁話。

老實講，新一屆嘅議會文化受到衝擊，議事廳除咗掟蕉，連炒蝦拆蟹嘅粗口都出埋，影響議會形象，某程度上都令到李慧琼幾唔開心，所以佢都好想聽吓精神科醫生有咩高見，等佢可以學吓點樣處理自己嗰個就爆嘅壓力煲咁話。

怪醫：善用醫療津貼

而一向有唔少精闢見解嘅「怪醫」梁家騮就好心水清，話議員本身已經有醫療津貼，加上為咗保障私隱，覺得有事都係自己搵精神科醫生穩陣啲喎。怪醫仲笑言，教議員紓壓嗰位醫生分分鐘仲大壓力，事關議員出名問題刁鑽，一旦當主講醫生好似官咁審就大鑊喇！

民協嘅KK馮檢基就話自己做咗議員咁多年，已經練成「不敗之身」，搵佢教大家點紓壓，仲好過搵精神科醫生喎！KK講到自己咁勁，點解秘書處唔近水樓台搵佢開班，而要搵「外援」呢？