咪睇間套房豆腐膶咁大，麻雀雖小，五臟俱全，集住房、廚房、洗手間於一身，起碼唔使同人哋爭廁所。所以，好多無錢買樓又唔夠資格入住公屋嘅市民都租劏房住。

不過，佢哋可能唔知道，由搬入去嗰刻起，就好似抱住個計時炸彈咁。由於當局疏於監管，劏房時亂咁拆牆毀柱起地台，破壞晒樓宇結構，分分鐘會冧樓死人。叮！

講出嚟嚇你一跳，好多舊樓都冇圖則嘅，邊戙牆受力，邊戙牆唔受力，全靠裝修師傅估估吓：「通常四吋牆可以拆，六吋就要考慮吓，八吋以上就唔掂得！」咁估法點得㗎，如果唔覺意拆咗受力牆，成幢樓咪變咗斷骨殘廢咁款，隨時踎低都似。

講真，提起劏房真係驚到一額汗。佢哋先拆晒所有牆，再砌番磚牆，為咗偷多啲地方，每塊磚都打直砌，戙牆薄到唔薄。更離譜嘅係，為咗開窗，連支撐成幢樓嘅主力柱都偷薄埋。仲有，因為水管多咗，就要加高地台將污水渠冚住，樓面負荷自然會加重，好大機會超載。如果喉管滲水就更大鑊，唔使幾年，石屎就脆晒。

咁樣劏法，就算層樓好地地，亦會變爛樓啦，何況呢啲舊樓都係四、五十歲嘅「耆英」，點頂得順呀？難怪發生土瓜灣冧樓事件後，好多劏房住戶都閉翳，擔心唔知幾時輪到自己。

叮！業主唯利是圖，罔顧安全，確係難辭其咎，但屋宇署玩忽職守更罪無可恕。《建築物條例》列明，只有唔改變樓宇結構嘅工程先至可以豁免申請。而正如有專家話齋，九成九劏房都會對樓宇結構有負面影響，但從來冇人會喺劏房之前主動申請。屋宇署亦闊佬懶理，有關法例形同虛設。

人哋話香港政府唔死人唔做嘢，講得一啲都冇錯，呢嗱，屋宇署本來對舊樓唔監唔管，家陣冧樓死人，就忽然轉性，係威係勢派出四十個專責小組巡查全港四千幢五十年或以上樓齡嘅樓宇。好嘞，住劏房嘅市民終於有覺好瞓喇。

咪開心住，睇吓佢哋點巡查先啦。屋宇署話喎，因法例所限，唔可以入屋檢查，只可以觀察外牆同公共地方。喂，連屋都唔入，點知層樓有冇畀人「劏」過呀？

更搞笑嘅係，有立法會議員踢爆，《建築物條例》明文規定，當局有權隨時入屋檢查樓宇狀況。大佬，連法例都未搞清楚，點執法呀？講到尾，呢班有法不依嘅官僚根本冇將舊樓居民嘅安全放喺心上。

做人要將心比心，俗語有話，泥水佬起門口，過得自己，先至過得人哋。請問屋宇署署長區載佳，如果住劏房嘅係你嘅親人，你哋仲會唔會咁心安理得吖嗱？叮！