專業及資深行政人員協會創會會長Samuel容永祺舊年年尾帶隊勇闖南極，尋日講起呢次南極之旅仍然好雀躍，話此行天氣奇佳，計落仲暖過今年受暴雪威脅嘅北京同吉林省，可惜南極重視生態保育，連一粒石都唔可以帶走，有團友惟有攞走幾粒冰放入樽帶返香港保存，但佢就連冰粒都冇攞走。
玩完南極都未夠喉，Samuel依家心思思想往北走，即係遠征北極。佢預計去北極難度比南極低，皆因坐飛機可以直達北極點，行程應該唔辛苦。不過有份帶隊嘅極地專家李樂詩就話自己年紀大，聲言去完南極之行就「金盆洗手」唔再帶隊。吓！咁就有啲棘手喎，所以Samuel話會落力游說李樂詩再出山喎。