話說張建宗去到一個賣咕嘅攤位時，見到幾個大學生揸住個蛋撻形咕落力叫賣，呢個咕嘅特色之處，就係上面嘅五官可以隨意配搭同黏貼，整出喜怒哀樂唔同表情。既然咁趣致，張建宗即刻就話買個返去墊吓腰骨嚟睇電視都好喎！

之不過，張建宗買咕冇問價，反而問班大學生：「你哋個檔位成本幾多呀？」冷不防佢咁問，班大學生即刻靜晒落嚟，見到咁嘅場面，過咗幾秒，張建宗先好似猛然諗起自己衰多口，於是有啲尷尬咁話：「係商業秘密呵！」梗係啦！做生意邊有人自揭底牌先得㗎！

唔知係咪諗住可以賺到局長嘅錢，班大學生竟然好識做咁幫張建宗打圓場，對住佢話：「第二個就唔講嘞！你呢，今晚send email話你知。」班大學生都好醒目喎，可能因為咁，張建宗買咕都打孖上，使咗二百二十八蚊，當係回報佢哋咁話。