扮嘢文尋日宣傳海洋公園新春節目時話，平時隨身攜帶三部電話，iPhone用嚟上網、Blackberry查電郵同埋一部接電話嘅手機。佢話舊年有一次去泰國，用手機透過免費Wi-Fi上網，唔知係咪手機接收唔到Wi-Fi訊號時，自動轉咗做GPRS收費模式收取數據，佢懵然不知，返港後收到張單，喺泰國短短六日，上網費竟然要一萬九千蚊，真係嚇咗一跳！

達成和解 唔使畀晒

之後佢就同電訊商理論，講明有啲上網費用唔關佢事。雙方最後達成和解，扮嘢文最後都畀咗部分費用，當係買個教訓。佢話，經此一役，出埠時都唔敢亂咁開着部iPhone咯。