中華廠商會尋日舉行新一屆會董就職禮，黃友嘉正式接棒做會長，近六百位政商界名流到賀，最矚目係兩位《福布斯》級新富豪，包括首次躋身《福布斯》香港富豪榜嘅中華總商會會長蔡冠深，同埋爸爸有份上榜嘅著名慈善家方潤華公子方文雄，仲有排名升咗級嘅「造紙大王」李運強。
上前恭喜蔡會長上榜時，佢面露疑惑咁話唔知自己上咗富豪榜，皆因佢啱啱考察完日本返港，未得閒睇報紙。對於突然升呢，佢坦言「上榜唔係咁好」，皆因佢做事作風低調，雖然爸爸係海產大王蔡繼有，但爸爸從小教佢節儉成家，返學冇得坐私家車，家住般咸道要徒步行半粒鐘返聖保羅男女校，即使長大後接掌家族生意，都堅守開源節流原則。
被問到家族上榜有乜感受，方文雄謙稱《福布斯》搞錯咗，自己根本唔入流喎，佢仲不忘勉勵年輕人努力向上：「唔想被邊緣化就要努力做嘢。」