究竟唔咬弦嘅傳聞係真定假？相信只有兩個當事人先知。早前「AO歌王」未返新工，就搶閘以候任民政局常秘嘅身份出席一個活動大派卡片，點知好似冤家路窄咁同林鄭撞到正，當記者要求佢同前老闆影張合照時，佢仲推三推四，卒之都有影到，但就同林鄭企一頭一尾，中間夾住行政會議召集人梁振英兩夫婦。咁嘅場面就更加係此地無銀三百両啦！

尋日咁啱見到「AO歌王」，當面叫佢比較吓發展局同民政局兩份工，佢話自己鍾意音樂同藝術，咁民政局呢啲瓣數好多，所以覺得適合自己多啲，仲話上禮拜就入咗元朗睇啲藝術節目，發現呢啲節目好似只係得元朗居民知道，而社會唔多關心咁。

曲線話自己投入新工

老實講，做得政務官，每隔幾年就要調去其他部門，冇乜可能話講興趣，「AO歌王」咁講，無非都係想話畀外界聽佢投入工作啫！

咁上一份工又點呀？佢話發展局管轄嘅範疇比較複雜，仲有就係跟城規會啲會議要好長時間，好辛苦。

呵！終於露咗啲口風嘞。眾所周知，林鄭係工作狂，跟住佢真係做到冇停手，聽「AO歌王」呻做得好辛苦，擺明話嗰時做到好似隻積咁嘅款啦！咁邊個畀咁多嘢佢做？唔使講，大家心知肚明咯呵！

至於佢新老闆德成局長，早前喺立法會以冇時間為由，拒絕開facebook戶口，尋日再畀傳媒問起呢件事，佢話最多只能用twitter，事關玩facebook花好多時間，喺電話上面玩，啲字太細好難睇喎，仲話副局長許曉暉都開咗facebook啦！諸多推搪，賴得就賴，總之佢就係唔肯開。