小白觀點：挖鄭汝樺耍賴一定掂

Google（谷歌）近日動作多多，郁啲就話要撤出中國，仲有幾個美國政棍同佢一齊癲添，認真囂張。最新一單就係發律師信畀「谷姐」（Goojje），最離譜係「谷哥」有單「侵權門」纏身，仲咁大聲夾惡，好彩阿姐都唔係善男信女，怕「谷哥」佢有毛，仲整番句「哥的留下是為了姐，哥依然迷戀着姐」，不知幾鬼瓊瑤，雖然聽落有啲打冷震，但真係大快人心呀！

正所謂爛佬怕潑婦，我建議如果谷姐想長期抗爭，一定要高薪挖鄭汝樺過去做CEO，即係谷姐大姐大。「谷哥」發多一百幾十封律師信又點吖，阿姐愛理不理唔肯接呀，吹咩，有乜嘢一係留番拜山至講，一係就喺佢百年一遇只開三粒鐘嘅facebook留言，不過阿姐聽唔聽就係另外一回事。「谷哥」當堂激爆肺，走都走唔切，谷姐只有含住兩泡淚唱：「只恨一水隔天涯，不知相會在何時……」

e-mail：sunsiupak@gmail.com

Blog：http://sunsiupak.blogspot.com

阿豪觀點：司法系統多得佢唔少

Google（谷歌）話要撤出中國，搞到滿城風雨。唔講大家可能唔知，原來內地除咗有谷歌之外，仲有個網站叫「谷姐」（Goojje），依家出現咗「谷歌告谷姐」侵權嘅搞笑場面，大家認為有冇問題呢？

睇嚟谷歌真係少見多怪，明知內地有網絡監管，都要嚟做生意，依家先嚟話走頭，又話人哋谷姐侵權。哈哈，如果係咁樣，內地肯定日日都要打官司啦，到時成個司法系統未必負荷得嚟。唔係咩，雪碧又話要告「雲碧」，康師傅又話要告「康帥博」，adidas又話要告「abibas」，到時真係好唔得閒。

上網睇一睇谷姐嘅logo，的確同谷歌有幾分相似，不如咁諗啦，有麝自然香，你都要成功至有人抄㗎！況且睇吓谷姐嘅宣傳語句：「哥的留下是為了姐，哥依然迷戀着姐」，人家都擺到明示好啦，你唔受咪算囉，唔使下下對簿公堂吓話？

e-mail：lukchiho75@hotmail.com

Blog：http://lukchiho.blogspot.com

網友觀點……

小　強：改個咁嘅名，擺明係想玩嘢啦，點會怕你告吖。

草食男：有競爭至有進步，還有谷姑、谷嬋、谷嫂……嗎？

Cali：內地同胞真偉大！

夢　吉：將Goojje譯成姑姐，咪唔會惹官非囉。

陪審員：谷歌話走又唔走，言而無信，係一個唔可信嘅證人……

有料爆：警犬跨欄勁過劉翔，勁！

SMS傾埋一份：6016 2496