大家睇過《西遊記》，都知道花果山孫大聖有個水簾洞，裏面風涼水冷，好食好住。但係喺現實生活中，如果你住嘅屋變咗水簾洞，咁就一啲都唔好受啦。嗱，太子道西加多利大廈二樓有個單位，天花由○六年起開始滲水，搞到廚房橫樑石屎嚴重剝落，水漬斑斑，屋主用三個密實袋接漏水，半日就裝咗五分一袋。
屋主曾多次向屋宇署同食環署成立嘅聯合滲水辦事處投訴，該處調查後證實係樓上單位廁所地台嘅防水設施欠妥所致。不過，雖然政府部門多次發信要求樓上單位業主修葺，但一直冇下文，甚至連申訴專員公署介入都冇符，一單滲水事故，就咁拖咗四年仲未解決。樓上業主係邊個，居然夠膽抗拒執法？咪就係退咗休嘅屋宇署前署長蔡宇略咯！
叮！蔡宇略既然做過屋宇署署長，應該好清楚樓宇滲水嘅後果，滋擾樓下單位唔在講，隨時仲可能影響樓宇結構，冧樓死人都有之。正如申訴署話齋，滲漏問題拖延多年，同蔡宇略採取不合作態度有關，批評佢未能和睦近鄰、守望相助、利己利人，令人大感遺憾。
唉，遺憾又點吖？蔡宇略明知業主有責任維護樓宇安全而袖手不理，已經唔係採取不合作態度咁簡單，而係明知故犯，有法不依！
講起嚟，蔡宇略原來早有一段濫權臭史。話說佢九九年臨近退休時買入呢個單位，居然委派下屬喺公務時間內幫佢評估清拆僭建地台嘅費用，畀當時嘅規劃環境地政局批評混淆公私，飭令交還九千幾蚊估價費用。正因為佢做官其身不正，人人敬而遠之，所以佢退休時屋宇署搞咗個歡送茶會，結果場面冷清，出席者得小貓三兩隻，瘀到痹！
點知佢死性不改，在任時濫權擺官威，退休後仲繼續玩特權，拒絕承擔業主責任，甚至阻撓政府部門執法，唔通佢當正自己係民初時期嘅軍閥，可以橫行霸道，為所欲為？
叮，蔡宇略就話橫行霸道蠻不講理啫，但係屋宇署同食環署作為名正言順、堂堂正正嘅執法部門，居然連單咁小嘅事都搞唔掂，咁就好難唔令人懷疑，係咪因為蔡宇略餘威猶在，得到前下屬特別優待呢？嗱，投訴人就話啦，件事之所以四年都未解決，懷疑可能同蔡宇略曾任屋宇署署長有關，要求調查係咪官官相衞。
其實喺香港，官官相衞一啲都唔出奇，最奇嘅係高官退咗休仲要玩特權，仲要耍無賴，你話香港成乜嘢世界吖，叮！