小白觀點：親民騷扮晒嘢

呢個欄大革新，諗住加入番多啲平台採納網民意見，點知搞到好多Blog友群情激憤。「都係舊嘅好」認為「依家想寫吓意見都無從入手，題目又唔知」；「小白臉」仲好似有啲火滾添，佢話：「點解要廢咗博客呢？SMS、facebook再加埋博客，廣開言路又有乜唔好？」

而「阿mo」更加一矢中的，佢認為「facebook太無私隱了~都是blog好wow」；「怒火焚身」幾乎想喊咁樣話：「小白兄，開番個Blog，畀個地方小弟發洩吓，好嗎？依家嘅facebook好唔方便，搞到冇晒mood！」

哎呀，真係對唔住呀，有怪莫怪，怪我哋嘅腦筋塞住晒，掛萬漏一，不過小白老弟同豪伯絕對唔會好似鄭汝樺咁，以為扮晒嘢喺facebook討論就叫親民，嘥氣啦，最後咪又係聽完就算。各位網友即日起繼續可以喺個Blog度發表意見，網址係http://sunsiupak.blogspot.com

阿豪觀點：新玩法開先河

政府口口聲聲話要同「80後」多啲溝通，鄭汝樺尋日就真係開咗個facebook account，不過得三粒鐘咁大把，而且仲係唔畀人add佢做朋友。相信咁樣玩facebook法，都算係開咗一個先河咯……

好多人都批評今次係假諮詢真做騷，其實只係啱咗一半。雖然鄭汝樺同一眾講者正襟危坐咁開研討會，但效果就同棟篤笑冇分別。大家睇佢回應咗網友咩問題？包括「你哋話我淨係顧住寫筆記冇同大家打招呼，大家好」，幾咁善解人意呀！

鄭汝樺唔肯喺facebook同大家做friend，其實又好正常嘅，高官幾時得閒同你班小市民認親認戚呀？

大家嘈到拆天都冇用，你慌鄭汝樺會聽你哋意見咩！我哋《任意網為》就唔同嘞，好多網友話都係以前可以喺Blog度暢所欲言好啲，收到！即刻開番個Blog同大家交流交流！網址係http://lukchiho.blogspot.com

網友觀點……

Greenspan Puppeteer：最搞笑係佢以為facebook有開關。

Sunlok Fung：呢啲咪叫冇誠意囉……扮吓聽你哋講嘢，但係永遠唔理人哋感受。

六六撒旦：希望佢真係聽啦，希望佢唔好再好似平時喺立會咁啦。

Carlos Wong：我想知道多啲關於未來基建項目嘅資料=,=”