香港友好協進會揀定中環廣場做會址，據協進會秘書長李祖澤同公關主任盧文端透露，早前佢哋同會長陳永棋一齊去睇過單位，由於嗰度嘅大業主係新鴻基地產同信和置業，咁啱新地董事郭炳湘同信置主席黃志祥都係政協，所以睇樓嗰日，郭炳湘親自帶棋哥佢哋睇樓。
咁都未算，協進會仲獲准使用三樓會所同只有大業主至可以使用嘅全海景私人俱樂部，場地擺到幾十圍酒席，以後協進會搞大型活動，就唔使出去物色場地嘞。
據聞中環廣場嘅單位若以市場租金成交，按現時市況，大約四十幾蚊一呎，一千呎大概要四萬幾蚊。講番呢個辦公室，據講，港區全國政協一直想有辦公室，但怕惹嚟兩個權力中心嘅非議，所以有傳由成員幾乎涵蓋所有港區全國政協嘅友好協進會出手，租個地方做港區政協嘅聚腳點都好吖！