星洲女歌手孫燕姿闊別香港三年幾，前日起一連兩日喺香港開演唱會，吸引好多歌迷，廠商會立法會代表林大輝尋晚都同老婆一齊入紅館捧偶像場。大輝話自己鍾意咗孫燕姿好多年，晚晚都要聽過佢嘅歌先瞓得着，孫燕姿嘅名曲《天黑黑》佢差唔多倒轉都識唱。
估唔到大輝堂堂立法會議員都好似小歌迷咁，唔講唔知，佢尋晚睇演唱會都係抱病出席，因為佢早前上河南開政協會議時帶唔夠衫，喺零下四、五度嘅天氣下梗係凍到病啦，返到香港又忽然升到十八、九度，一冷一熱，所以佢嘅感冒遲遲未好。
尋日香港青年工業家協會搞咗個政改諮詢論壇，身兼協會榮譽顧問嘅大輝做客席主持，佢上台一出聲，大家就聽到佢把聲好磁性，仲帶少少沙啞。開完論壇佢擒擒青返公司做嘢，以便夜晚去捧孫燕姿場，呢個歌迷真係夠神心。