本文重點
商務及經濟發展局局長劉吳惠蘭（Rita）係行山愛好者，尋日禮拜六，適逢天氣陰陰涼涼，佢特登約埋常秘蔡瑩璧同專責旅遊工作嘅旅遊事務專員容偉雄、旅發局總幹事劉鎮漢等人一齊去行山，佢哋仲邀請埋日本駐港總領事佐藤重和同副總領事松永大介同行，行程包括去地質公園睇S形岩柱，真係一樂也。
日本客愛遊大自然
佢哋咁多人同行，梗係唔係私人行山咁簡單啦，旅遊界人士都話，日本客好鍾意行山等大自然旅遊，而香港由城市去郊野公園唔使半粒鐘車程，最近又有幾個地方都被列入地質公園，佢哋尋日去行嘅萬宜地質步道就係一例，所以Rita佢哋搵埋日本朋友一齊去睇吓，順便推介香港旅遊。
據講，Rita差唔多每一個禮拜都會去行吓山，尋日佢一件恤衫加風褸再孭多個LeSportsac，通風又透氣，行山過程中又可以同啲市民傾吓偈吹吓水，都算係一樣唔錯嘅運動。