男人最怕失威，生產力促進局主席陳鎮仁尋日卻主動自爆，生產力促進局早前畀審計署大鬧亂花公帑、濫發花紅，一年唔見五千幾萬元物資後，自己都受唔少壓力，其中一個來源就係太座，事關老婆睇完審計報告後，都鬧佢點解管得咁差？雖然一句起兩句止，但犧牲自己嘅私隱兼夫威，無非都係想幫自己同個局嘅同事講好說話啫。
立法會政府帳目委員會查完數後，對生促局表示「極度遺憾」，陳鎮仁尋日喺電台節目中，就大講該局嘅歷史解圍。佢話生促局過去幫咗好多細廠變大廠，又為廠商引入先進科技同轉型，唔係完全無貢獻，而且審計署出咗報告後，佢哋已洗心革面，推行翻天覆地嘅改革，希望盡快提升管治質素，唔好再惹人詬病。
該局被批評濫發花紅，陳鎮仁就話，政府只係資助佢哋三成開支，其他都要由員工自己搵錢返嚟，所以用盈餘獎勵員工好合理。佢仲話，畀老婆鬧完後，佢即刻解釋番前前後後嘅原因，最後太座大人都對生促局改觀。哦，原來佢兜咁大個圈都係要話畀人聽，連扭佢耳仔嘅太太都明白晒，市民唔好再怨佢哋喇！