克勤仔話佢年年都有落區寫揮春，以往淨係識得寫「大吉」二字，頂多都係寫個「靚」字氹師奶，雖有創意，但就冇乜美感，今年卒之狠下心腸向書法了得嘅嬌姐拜師，專寫「福」字。嬌姐大讚徒弟克勤仔天資好，話示範兩次就已經學到嘢兼駕輕就熟添。

克勤話苦練咗一個禮拜，日日都落區寫成千幾二千張，依家寫個福字，真係八秒就起貨㗎。不過佢自爆曾經畀街坊質問點解佢寫嘅「福」字同嬌姐嗰個一模一樣，搞到佢好尷尬。睇嚟佢都要練多幾個字先得喇！