立春之後虎年就快來臨，術數師楊子東舊年批中煲呔曾喺牛年農曆九月運勢衰到貼地，結果爆單慳電膽益親家風波出嚟。踏入虎年，楊師傅又點睇呢？佢話今年係多人失業同生意難做嘅一年，多名司局長會遇到險阻，煩惱多多。唔通煲呔曾嘅黑氣擴散咗落一眾下屬度？
楊師傅以立春八字推算香港虎年運程，八字係「金木反剋，比劫爭財，木旺土虛，為官神傷」，佢話今年係「比劫爭財，僧多粥少」局面，即係多人失業，好可能四個人爭兩份工，而且今年嘅八字屬「金木反剋」格局，金剋木意味住虎年交通意外頻生，尤其係以大型車輛撞倒人群嘅意外較多。
而為官或從政者就表面威風，上月底馬頭圍道冧樓事件後，矛頭直指發展局局長林鄭月娥，楊師傅話，林鄭八字從殺格，今年屬於「損兵折將」局面，即會被不濟嘅下屬連累，或會削弱政府民望，但對佢個人仕途無損，到農曆七、八月運勢會較為波動。另一位要小心嘅高官就係保安局局長李少光，六、九同十二月都係麻煩多多嘅月份，五月更要小心健康。
最後要批嘅係政務司司長唐英年，八字推斷佢今年係忙中有錯嘅一年。咁多下屬都運氣麻麻，煲呔曾政府喺虎年想唔疲於奔命都難嘞。