班「80後」喺高鐵一役搞到政府措手不及之後，下亞厘畢道最潮嘅玩意就係上社交網站facebook，聽講有啲後生公務員奉命專責玩facebook，連早排瞓身打高鐵戰嘅運輸及房屋局局長鄭汝樺尋日都要公開玩facebook。下一個可能係政制及內地事務局局長「林公公」林瑞麟，佢尋日被問到會唔會利用facebook嘅平台諮詢政改時，就話遲啲新一階段工作時會考慮引入新媒介，可見林公公似乎已預咗遲吓要喺facebook上搵朋友！
借尿遁拆招
林公公尋日去咗香港青年工業家協會同香港各界商會聯席會議舉辦嘅「政改方案簡介會」聽意見，佢到場時先行咗去記者堆，似乎準備要回答問題，但聽到有人問佢會唔會喺facebook開戶諮詢市民時，佢即刻話自己「好趕時間」，然後一個箭步衝入廁所，「借尿遁」咗一陣先埋位回應問題。佢話過去三個月用咗好多方法包括電郵等聽意見，等諮詢期結束後，下階段工作會考慮納入更多媒介做諮詢。
呢個講法等於變相認衰兼後知後覺，事關facebook近日已經慶祝六歲生日，但港府推行三個月嘅政改諮詢卻完全冇諗過利用呢個渠道，或者係咁，林公公惟有話下階段工作先做啦。
唔熟互聯網
講開呢班老餅高官用facebook等新興網上溝通工具，真係得啖笑，日前民政事務局局長曾德成先以冇時間為由，將開facebook嘅責任推咗畀副手許曉暉，依家林公公又搞到要借尿遁度橋，諗定對白先解畫，可見佢哋對facebook嘅心結有幾深。其實，互聯網早就令成個資訊世界出現翻天覆地嘅變化，港府一眾高官依家先如夢初醒咁追趕呢架快車，都唔知係好嬲定好笑！