新一份財政預算案本月底就要出爐，各界都希望財爺鬍鬚曾推出惠民措施，唔好再孤孤寒寒一毛不拔。事關公眾利益，各黨派議員放下歧見，齊齊要求當局推出紓困措施，正正顯示民意所在，民心所向。

嗱，民意已經好清楚，依家就睇政府識唔識做喇。去年樓市、股市暢旺，印花稅大增，政府賣地收入又理想，庫房直情係豬籠入水。有會計師行估計，本財政年度唔單止唔會如政府預期有幾百億赤字，仲可能有可觀財政盈餘。所以政府唔係冇能力派糖，而係想唔想派糖。

其實議員嘅要求都唔係好高啫，例如要求政府津貼貧困學童上網、提供全港性交通津貼、取消申領生果金嘅離港限制、增加長者醫療券至一千元等等，全部都係基層市民嘅迫切需求。正如議員話齋，現時經濟話就話稍為好轉，但基層市民生活並冇改善，好多人收入不增反減，仲要擔心通脹，如果政府袖手旁觀，對佢哋嚟講，又係另一次打擊。

話時話，香港貧富懸殊愈嚟愈犀利，深層次矛盾愈嚟愈惡化，連行政會議召集人梁振英都直言，香港貧窮問題特殊，基層無法分享經濟成果，收入下跌，出現反商情緒，呢種生產同分配嘅矛盾，正正就係深層次矛盾之一。

梁振英一番話，點中晒政府嘅死穴。政府嘅扶貧政策乏善可陳，扶貧措施到喉唔到肺，仲係唔鬧唔做嗰隻。咁搞法，有乜法子唔係窮嘅愈窮，富嘅愈富吖？叮，矛盾愈積愈深，民怨愈積愈大，香港想唔亂都幾難喇！

議員反映民意，齊心合力逼政府推出利民紓困措施，正係人同此心，心同此理。睇見咁嘅環境，鬍鬚曾如果唔係麻木不仁嘅話，都應該識做啩。聽吓佢點講，佢話喎，聽咗好多要求政府推出更多紓困措施嘅意見，但亦有人反對派糖，所以要平衡各方意見咁話。叮，照鬍鬚曾咁講，即係唔想派糖，唔想利民紓困喇，係咪？

更離譜嘅係，鬍鬚曾平時口口聲聲要做好諮詢，仲拍埋宣傳片添，但立法會討論財政預算咁大件事，佢居然以「唔能夠分身」拒絕出席。

之但係，立法會開會鬍鬚曾可以做縮頭烏龜，但面對幾百萬市民嘅強烈要求，睇吓佢又點樣逃避，叮！