小白觀點:唔使畀錢仲有錢收
以前啲家長好鼓勵細路仔集郵,不過依家就咪亂嚟喇,早排有個拍賣大會,「小壹圓」竟然以四百幾萬元天價成交,如果囝囝又想要,做家長唔通咁講咩:「嗱,老竇得四百萬養大你,如果你要呢張郵票,以後你要食自己喇。」
事實上,依家集郵嘅玩法已經好唔同,之前有人喺Google打過一個「道」字,你估排頭出嘅係乜?竟然係「道歉時露出胸部是常識吧」,仲一共有六萬幾個搜尋結果;你試試打「集郵」,即刻彈出「集郵女」、「集郵女星」、「集郵女星是誰」一大堆。
不過要數玩集郵玩得叻,當然唔少得搞到英格蘭國家隊隊長泰利一身蟻嘅內衣索女模佩龍塞爾啦!單嘢愈揭愈臭,原來佢同過車仔唔少球員有過一腿,泰利都唔知係第幾手,唔使畀錢仲有天價C口費收添,可以講得上係名副其實嘅集郵女王。
sunsiupak@gmail.com
阿豪觀點:非屬女性專有玩意
英格蘭國家足球隊隊長泰利個情人佩龍塞爾原來一啲都唔簡單,除咗泰利之外,仲同英超好多球星有一手,甚至可以組成「車仔之星五人隊」。再發展落去,話唔定可以打洲際國家盃添。
以前講起集郵呢個嗜好,係純到好似白開水咁。仲記得睇過劉以鬯嘅《模型.郵票.陶瓷》,裏面講到嗰啲集郵嘅人,真係專心致志,連發夢都諗住自己得唔到嘅珍品,認真唔講得笑。
但係唔知幾時開始,「集郵」被用嚟形容女人同唔同男士結合。喺度豪伯真係要抗議性別歧視呀,講到「集郵」,男人、尤其是我哋中國同胞不知幾耍家。幾年前有個內地貪官,情婦多不在話下,佢仲有鋪怪癮,每次都要收集對方一條恥毛嚟珍藏,仲將佢哋收藏喺一本筆記簿裏面添!佩龍塞爾絕對未夠班啦。
網友觀點……
白 撞:我都想集郵呀,最好係有得交換郵票嘛。
陳振窿:你估同佢搞埋嗰啲男人唔知咩,都係各取所需啫!
小 黑:我嘅目標係成為一張珍貴嘅郵票。
Betty:啲人成日話足球明星成日搞嘢腳軟冇力踢波,你睇車仔幾勁!
SMS傾埋一份:6016 2496