話說天文台計劃喺屯門大欖角興建一座球形嘅新天氣雷達站，為機場探測風切變，以確保航空交通安全，但遭附近嘅大欖涌村居民擔心雷達站起喺天后廟位處嘅山頂，等於要天后娘娘頭上頂住個波，加上雷達站起喺村內「青龍位」，嚴重影響風水之餘，發出嘅輻射亦危害健康，所以大力反對。

天文台早前已讓步降低雷達站高度，但村民仍堅決反對，負責嘅商務及經濟發展局官員尋日就請發叔出面做和事老，游說村民，但村民始終企硬，發叔只好要求政府考慮其他選址。

咁又難怪啲村民嘅，當初有成二十個選址，最後又係選中厭惡設施集中地屯門區，有村民呻話：「之前起大欖涌監獄、起小欖精神病院我哋都冇怨過，六合彩又唔見我哋中喎！」