本文重點
政府為防止泛民主派不斷重演辭職騷，正集中火力鑽研外國嘅做法，希望趕及出年就二○一二年兩個選舉辦法進行本地立法時一併修例，但初步睇嚟，政府覺得現時建制派提出嘅兩個方案都唔係咁行得通。
好似規限議員辭職後唔可以喺當屆重返議會，先唔講有冇違反《基本法》保障市民有被選權同選舉權嘅條文，從政治現實層面睇，根本發揮唔到阻止泛民玩嘢，例如九西黃毓民辭職，社民連搵陶君行參加補選都得，五區如是，你都奈佢唔何。至於規限議員當選後唔可以隨便辭職就更加行唔通，因為市民有被選權同選舉權，更加有辭職權。
自動遞補方式值得參考
反而，政府喺研究外國做法過程中，發現澳洲某省議會，規定以自動遞補方式填補議席空缺嘅模式，值得香港參考，易操作又慳錢，最重要係合憲合法，有先例可援，經得起司法覆核。其實呢套模式港區全國人大都用緊，特區成立以嚟，有兩屆由於有人大代表過身，梁秉中兩次都以得票排名第三十七名遞補成為人大代表。
話說回頭，若果政府依家係用緊呢套遞補模式嘅話，睇怕公社兩黨亦唔會咁偉大辭職，益咗對手，所以出年政府若然建議以呢個模式修例，相信泛民第一個舉手反對！