本文重點
早前高鐵撥款發生警民衝突後，外界狂轟政府諮詢方法落後，同班「80後」嘅溝通嚴重不足，就連煲呔曾都認衰話要檢討。依家各個部門都開始諗計補鑊，運輸及房屋局局長鄭汝樺今日會喺社區網站facebook開壇，同網民傾吓點改善公眾參與討論；發展局局長林鄭月娥亦會開咪，喺電台主持烽煙節目直接聽市民對社區重建嘅意見。
收集民意重心懶懶閒
睇嚟兩位局長都會出師不利，因反高鐵大聯盟已講明唔參加政治化妝遊戲，而林鄭嘅節目要花成十六萬元，最後有冇效都唔知。不過，佢哋都算識得轉膊吖，但本身應該係收集民意重心嘅民政事務局就懶懶閒。
立法會民政事務委員會尋日開會討論青少年發展政策，建仔議員陳克勤話民政事務局副局長許曉暉已經玩開facebook，問身為局長嘅曾德成幾時先開番個戶口，等大家有機會喺網上溝通吓呀？點知德成局長詐傻扮懵，話自己忙到連同議員面對面傾偈嘅時間都冇，所以係咪玩facebook要再諗吓先喎！
嗱！話加強溝通都係得把口啫，到咗要佢做就諸多藉口嘞！德成局長嘅理由係乜？政府到底幾有心同青年人傾偈？心照啦！